ꠝꠣꠐ꠆ꠐꠥꠝꠣ
ꠝꠣꠐ꠆ꠐꠥꠝꠣ (Part of speech) ꠅꠁꠟ ꠝꠣꠔꠞ ꠐꠥꠝꠣ ꠛꠣ ꠅꠋꠡ⁕ ꠄꠞꠖꠣꠄ ꠁꠉꠥꠞꠦ ꠝꠣꠔꠋꠡ ꠅ ꠈꠀ ꠎꠣꠄ⁕ ꠝꠣꠐ꠆ꠐꠥꠝꠣ ꠝꠥꠟꠔ ꠇꠥꠘꠥ ꠝꠣꠔꠞ ꠉꠑꠘ, ꠡꠛ꠆ꠖꠞ ꠍꠤꠘ, ꠈꠣꠐꠣꠈꠣꠐꠤ ꠀꠞ ꠅꠁꠘ꠆ꠘꠣꠁꠘ꠆ꠘ ꠝꠣꠔꠈꠕꠣꠞ ꠎꠤꠘꠤꠡꠞꠦ ꠛꠥꠏꠣꠄ⁕ ꠡꠥꠎꠣ ꠈꠕꠣꠄ ꠛꠣꠁꠇ꠆ꠇꠞ ꠝꠣꠏꠦ ꠛꠦꠛꠀꠞ ꠅꠀ ꠚꠞꠔꠦꠈꠐꠣ ꠡꠛ꠆ꠖꠞꠦ ꠄꠈꠦꠈꠐꠣ ꠝꠣꠐ꠆ꠐꠥꠝꠣ ꠈꠄ⁕ ꠍꠤꠟꠐꠤ ꠝꠣꠔꠅ ꠝꠣꠐ꠆ꠐꠥꠝꠣꠞꠦ ꠀꠐꠉꠥ ꠐꠥꠝꠣꠖꠤ ꠛꠣꠐꠣ ꠎꠣꠄ⁕ ꠎꠦꠟꠣꠘ- ꠘꠤꠎꠘꠣꠝ, ꠚꠞꠘꠣꠝ, ꠉꠥꠘꠉꠣꠘ, ꠜꠣꠞꠈꠣꠝ, ꠢꠣꠟꠈꠣꠝ, ꠢꠝꠘ꠆ꠖꠈ, ꠉꠉꠣꠅꠈ ꠅꠔꠣꠁꠘ⁕
- ꠝꠥꠟ ꠘꠤꠎꠘꠣꠝ
ꠘꠤꠎꠘꠣꠝ (ꠁꠋꠟꠤꠡ: Noun ꠎꠦꠉꠥ ꠟꠦꠐꠤꠘ nōmen ꠡꠛ꠆ꠖ ꠔꠘꠦ ꠀꠁꠍꠦ; ꠎꠣꠞ ꠝꠣꠘꠦ ꠘꠣꠝ) ꠛꠣ ꠘꠣꠝꠣꠁꠘ ꠍꠤꠟꠐꠤ ꠈꠣꠄꠖꠣꠞ ꠄꠉꠥ ꠝꠣꠐ꠆ꠐꠥꠝꠣ⁕ ꠡꠣꠗꠣꠞꠘꠔ ꠛꠣꠁꠇ꠆ꠇꠞ ꠝꠣꠏꠦ ꠎꠦꠔꠣ ꠝꠣꠐ꠆ꠐꠥꠝꠣ ꠖꠤ ꠝꠣꠘꠥ, ꠎꠣꠔꠤ, ꠎꠤꠘꠤꠡ, ꠁꠍꠔꠣꠘ, ꠐꠣꠁꠝ, ꠜꠣꠛ, ꠈꠣꠝ ꠛꠣ ꠈꠣꠁꠍꠟꠔꠞ ꠘꠣꠝ ꠛꠥꠏꠣꠄ ꠁꠔꠣꠞꠦ ꠘꠤꠎꠘꠣꠝ ꠛꠣ ꠘꠣꠝꠣꠁꠘ ꠈꠄ⁕ ꠀꠞꠛꠤ-ꠚꠣꠞꠍꠤꠔ ꠁꠉꠥꠞꠦ 'ꠁꠍ꠆ꠝ" ꠈꠄ⁕ ꠝꠣꠘꠦ ꠎꠦꠍꠣꠔꠣꠞ ꠘꠣꠝꠞꠦ ꠘꠤꠎꠘꠣꠝ ꠛꠣ ꠘꠣꠝꠣꠁꠘ ꠈꠄ⁕ ꠎꠦꠟꠣꠘ- ꠍꠣ, ꠈꠝꠟꠣ, ꠍꠤꠟꠐ ꠅꠔꠣꠁꠘ⁕
- ꠝꠥꠟ ꠚꠞꠘꠣꠝ
ꠚꠞꠘꠣꠝ (ꠁꠋꠟꠤꠡ: Pronoun) ꠍꠤꠟꠐꠤ ꠈꠣꠄꠖꠣꠞ ꠄꠉꠥ ꠝꠣꠐ꠆ꠐꠥꠝꠣ, ꠎꠦꠉꠥ ꠘꠤꠎꠘꠣꠝ ꠛꠣ ꠘꠣꠝꠣꠁꠘ꠆ꠔꠞ ꠛꠖꠟꠣ ꠛꠄ⁕ ꠝꠣꠘꠦ ꠘꠤꠎꠘꠣꠝ ꠛꠣ ꠘꠣꠝꠣꠁꠘ ꠛꠣꠞꠛꠣꠞ ꠈꠀꠞ ꠛꠖꠟꠣ ꠎꠦ ꠡꠛ꠆ꠖ ꠛꠣ ꠡꠛ꠆ꠖꠣꠁꠘ ꠈꠀ ꠅꠄ ꠅꠔꠣꠞꠦ ꠚꠞꠘꠣꠝ ꠈꠄ⁕ ꠎꠦꠟꠣꠘ- ꠝꠥꠁ, ꠝꠞ, ꠢꠦ, ꠔꠣꠁ ꠅꠔꠣꠁꠘ⁕
- ꠝꠥꠟ ꠉꠥꠘꠉꠣꠘ
ꠉꠥꠘꠉꠣꠘ (ꠁꠋꠟꠤꠡ: adjective) ꠅꠁꠟ ꠍꠤꠟꠐꠤ ꠈꠣꠄꠖꠣꠞ ꠄꠉꠥ ꠝꠣꠐ꠆ꠐꠥꠝꠣ, ꠎꠦꠉꠥ ꠛꠣꠁꠇ꠆ꠇꠞ ꠅꠁꠘ꠆ꠘ ꠇꠥꠘꠥ ꠝꠣꠐ꠆ꠐꠥꠝꠣꠞ (ꠘꠤꠎꠘꠣꠝ, ꠚꠞꠘꠣꠝ ꠀꠞ ꠜꠣꠞꠈꠣꠝ) ꠖꠥꠡ, ꠉꠥꠘ, ꠅꠛꠍꠕꠣ, ꠡꠁꠋꠇꠣ, ꠚꠞꠤꠝꠣꠘ ꠅꠔꠣꠞꠦ ꠛꠥꠏꠣꠄ⁕
- ꠝꠥꠟ ꠜꠣꠞꠈꠣꠝ
ꠎꠦ ꠝꠣꠐ꠆ꠐꠥꠝꠣ ꠖꠤ ꠇꠥꠘꠥ ꠈꠣꠝ ꠈꠞꠣ ꠛꠥꠏꠣꠄ, ꠔꠣꠞꠦ ꠍꠤꠟꠐꠤ ꠈꠣꠄꠖꠣꠄ ꠜꠣꠞꠈꠣꠝ (ꠁꠋꠟꠤꠡ: Verb) ꠒꠣꠈꠦ⁕ ꠝꠣꠘꠦ ꠛꠣꠁꠇ꠆ꠇꠞ ꠎꠦ ꠝꠣꠐ꠆ꠐꠥꠝꠣ ꠖꠤ ꠎꠦꠍꠣꠎꠣꠔ ꠈꠣꠝ ꠈꠞꠣ ꠛꠣ ꠈꠣꠝ ꠅꠀ ꠛꠥꠏꠣꠄ, ꠁꠉꠥꠞꠦ ꠜꠣꠞꠈꠣꠝ ꠈꠄ⁕ ꠎꠦꠟꠣꠘ- ꠈꠣꠅꠀ, ꠎꠣꠅꠀ, ꠘꠣꠅꠀ, ꠊꠥꠝꠣꠘꠤ ꠅꠔꠣꠁꠘ⁕
- ꠝꠥꠟ ꠢꠣꠟꠈꠣꠝ
ꠎꠦ ꠝꠣꠐ꠆ꠐꠥꠝꠣ ꠖꠤ ꠇꠥꠘꠥ ꠜꠣꠞꠈꠣꠝ, ꠚꠞꠘꠣꠝ ꠘꠣꠄ ꠅꠁꠘ꠆ꠘ ꠇꠥꠘꠥ ꠀꠘꠈꠣꠝꠞꠦ ꠛꠞ꠆ꠘꠘꠣ ꠈꠞꠣ ꠅꠄ, ꠁꠉꠥꠞꠦ ꠍꠤꠟꠐꠤ ꠈꠣꠄꠖꠣꠄ ꠢꠣꠟꠈꠣꠝ (ꠁꠋꠟꠤꠡ: Adverb) ꠒꠣꠈꠦ⁕ ꠈꠣꠝꠞ ꠢꠣꠟꠞꠦ ꠛꠣꠐ꠆ꠐꠤꠈꠞꠤ ꠢꠣꠟꠈꠣꠝ ꠈꠅꠀ ꠅꠄ⁕ ꠁꠉꠥꠞꠦ ꠇꠥꠘꠥ ꠇꠥꠘꠥ ꠡꠝꠄ ꠀꠈꠣꠝ (ꠎꠦꠉꠥ ꠝꠥꠟꠔ ꠀꠘꠈꠣꠝ ꠀꠞ ꠀꠘ꠆ꠖꠥꠈꠣꠝꠞ ꠝꠤꠟꠣꠁꠟ ꠞꠥꠚ) ꠈꠅꠀ ꠎꠣꠄ⁕ ꠁꠉꠥꠖꠤ ꠝꠥꠟꠔ ꠇꠤꠀꠘ, ꠇꠥꠘꠛꠣꠟꠣ, ꠇꠤꠟꠣꠘ, ꠈꠔꠈꠣꠘ ꠅꠔꠣ ꠚꠍ꠆ꠘ ꠅꠈꠟꠞ ꠎꠥꠀꠚ ꠖꠦꠅꠀ ꠅꠄ⁕ ꠎꠦꠟꠣꠘ- ꠎꠦ, ꠎꠦ ꠞꠥꠡꠦ, ꠈꠟꠦꠈꠟꠦ⁕
- ꠝꠥꠟ ꠢꠝꠘ꠆ꠗꠈ
ꠎꠦ ꠝꠣꠐ꠆ꠐꠥꠝꠣ ꠖꠤ ꠇꠥꠘꠥ ꠡꠛ꠆ꠖ, ꠡꠛ꠆ꠖꠣꠁꠘ ꠘꠣꠄ ꠛꠣꠁꠇ꠆ꠇꠞ ꠟꠉꠦ ꠅꠁꠘ꠆ꠘ ꠇꠥꠘꠥ ꠡꠛ꠆ꠖ, ꠡꠛ꠆ꠖꠣꠁꠘ ꠘꠣꠄ ꠛꠣꠁꠇ꠆ꠇꠁꠘ꠆ꠔꠞ ꠝꠤꠟ ꠛꠥꠏꠣꠄ, ꠁꠉꠥꠞꠦ ꠍꠤꠟꠐꠤ ꠈꠣꠄꠖꠣꠄ ꠢꠝꠘ꠆ꠗꠈ (ꠁꠋꠟꠤꠡ: Conjunction) ꠒꠣꠈꠦ⁕ ꠝꠣꠘꠦ ꠄꠈ ꠡꠛ꠆ꠖꠞ ꠟꠉꠦ ꠀꠞꠈ ꠡꠛ꠆ꠖꠞ, ꠘꠣꠄ ꠛꠣꠁꠇ꠆ꠇꠞ ꠟꠉꠦ ꠀꠞꠈ ꠛꠣꠁꠇ꠆ꠇꠞ ꠝꠤꠟ ꠈꠞꠣꠞꠦ ꠢꠝꠘ꠆ꠗꠈ ꠈꠄ⁕ ꠎꠦꠟꠣꠘ- ꠀꠞ, ꠇꠤꠘ꠆ꠔꠥꠇ, ꠘꠣꠄ, ꠄꠞꠖꠣꠄꠅ ꠅꠔꠣꠁꠘ⁕
- ꠝꠥꠟ ꠉꠉꠣꠅꠈ
ꠎꠦ ꠝꠣꠐ꠆ꠐꠥꠝꠣ ꠖꠤ ꠇꠥꠡꠤ-ꠛꠣꠡꠤ, ꠖꠥꠇ-ꠖꠞꠖ, ꠡꠥꠁꠖ꠆ꠖꠣ ꠎꠦꠍꠣꠎꠣꠔꠤ ꠀꠛꠦꠉ, ꠞꠣꠄꠎꠣꠟꠣ ꠅꠔꠣꠁꠘ ꠛꠥꠏꠣꠄ, ꠁꠉꠥꠞꠦ ꠍꠤꠟꠐꠤ ꠈꠣꠄꠖꠣꠄ ꠉꠉꠣꠅꠈ (ꠁꠋꠟꠤꠡ: Interjection) ꠒꠣꠈꠦ⁕ ꠝꠣꠘꠦ ꠀꠈꠔꠣ ꠉꠉꠣꠘꠤꠞ ꠖꠣꠄ ꠎꠦ ꠝꠣꠐ꠆ꠐꠥꠝꠣ ꠖꠤ ꠚꠥꠞꠔꠤ, ꠞꠣꠄꠎꠣꠟꠣ ꠅꠔꠣꠁꠘ ꠛꠥꠏꠣꠄ, ꠅꠉꠥꠞꠦꠃ ꠉꠉꠣꠅꠈ ꠅꠄ⁕
- ꠝꠥꠟ ꠟꠉ꠆ꠉꠤꠡꠣꠞꠣꠖꠣꠞ
ꠟꠉ꠆ꠉꠤꠡꠣꠞꠣꠖꠣꠞ (ꠁꠋꠟꠤꠡ: Determiner) ꠅꠁꠟ ꠅꠔꠣ ꠡꠛ꠆ꠖ, ꠡꠛ꠆ꠖꠎꠥꠠ ꠀꠘ꠆ꠘꠣꠄ ꠚꠁꠟꠤ/ꠡꠦꠡꠤꠟꠤ ꠎꠦꠔꠣ ꠇꠥꠘꠥ ꠘꠤꠎꠘꠣꠝ ꠀꠘ꠆ꠘꠣꠄ ꠘꠣꠝꠎꠥꠠꠞ ꠟꠉꠦ ꠛꠁꠀ ꠝꠣꠔ ꠀꠘꠝꠣꠘ ꠘꠣꠝꠣꠁꠘ ꠅꠈꠟꠞ ꠢꠣꠟ ꠛꠣ ꠡꠝ꠆ꠙꠞ꠆ꠇ ꠛꠥꠏꠣꠄ⁕ ꠝꠥꠟꠔ ꠟꠉ꠆ꠉꠤ ꠀꠞ ꠁꠡꠣꠞꠣꠖꠣꠞ ꠅꠞ ꠝꠤꠡꠣꠁꠟ ꠞꠥꠚ ꠅꠁꠟ ꠟꠉ꠆ꠉꠤꠡꠣꠞꠣꠖꠣꠞ⁕